I-Ingonyama Trust Board (ITB) iyamukela izingxoxo nezincomo ezenziwe yiKomiti yePhalamende ebhekele uHlelo lweZinguquko kwezoMhlaba noThuthukiso lweZindawo Zasemakhaya mayelana ne-Ingonyama Holdings (IH), inkampani engaphansi kwe-Ingonyama Trust eyasungulwa njengengxenye yezohwebo ye-Trust ngesikhathi uMnu. Ngwenya engusihlalo we-Ingonyama Trust Board.

I-ITB iyazisa indlela iKomiti eyibona ngayo imbangela yokukhathazeka mayelana nezindaba zokuphatha nokuziphendulela eziphathelene ne-IH, eqhubeka nokusebenza ngaphandle kwegunya le-Ingonyama Trust naphezu kokunqanyulwa kobudlelwano nokuzihlukanisa kwayo obusobala. Ukucutshungulwa kwezinyathelo eziqinile yiKomiti, okuhlanganisa ukubandakanyeka kwe-Special Investigating Unit (SIU), kuyisinyathelo esibalulekile sokubuyisela isimiso sokuziphendulela nokuvikela izinsiza zemiphakathi engaphansi kwegunya le-Ingonyama Trust.

I-ITB isivele iyidluliselile le ndaba ku-Companies and Intellectual Property Commission (CIPC) futhi yazama ukuvula icala lokukhwabanisa emaphoyiseni aseNingizimu Afrika (SAPS). Nokho, njengoba kungekho ntuthuko kuze kube manje, i-ITB iyaweseka umbono weKomiti wokuthi kudingeka ezinye izinyathelo zokuphenya nokuqinisekisa ukuthotshelwa komthetho.

Ukuzibophezela Ekuziphenduleleni

“I-Ingonyama Trust Board iyazisekela ngokugcwele izincomo zeKomiti futhi izibophezele ekusebenzeni nePhalamende, uhulumeni, kanye nezinhlaka zomthetho ukuqinisekisa ukuthi noma yikuphi ukungahambi kahle okuhlobene ne-Ingonyama Holdings kuyaphenywa, nokuthi kuqinisekiswa ukuthi abantu bayaziphendulela,” kusho uMnu. Siyamdumisa Vilakazi, i-CEO yesikhashana ye-ITB.

I-ITB iphinda iqinisekisa umsebenzi wayo wokusebenzela izintshisekelo zemiphakathi eyisebenzelayo futhi izoqhubeka nokusebenzisa zonke izindlela zomthetho nezinhlaka ezifanele ukuze ibuyise izimali futhi ivikele isithunzi se-Trust.

Ukuze uthole eminye imininingwane, sicela uxhumane neNhloko yoMnyango Wezokuxhumana uMnu. Simpiwe Mxakaza ku-063 315 4113 noma ku-mxakazas@ingonyamatrust.org.za

KUPHELILE –

Kukhishwe yi-Ingonyama Trust Board